Loading

Archive

Category: News

45 posts

ജല്‍ജീവന്‍ മിഷന്‍: പഞ്ചായത്ത്; ഗുണഭോക്തൃ വിഹിതം എംഎല്‍എ ഫണ്ടില്‍നിന്നും കണ്ടെത്താന്‍ അനുമതി

ജല്‍ജീവന്‍ മിഷന്‍: പഞ്ചായത്ത്; ഗുണഭോക്തൃ വിഹിതം എംഎല്‍എ ഫണ്ടില്‍നിന്നും കണ്ടെത്താന്‍ അനുമതി

ജല്‍ജീവന്‍ മിഷന്‍ പദ്ധതി പ്രകാരം പഞ്ചായത്തുകളില്‍ നടപ്പാക്കുന്ന കുടിവെള്ള പദ്ധതിക്കുള്ള പഞ്ചായത്ത്, ഗുണഭോക്തൃ വിഹിതം ആവശ്യമെങ്കില്‍ എംഎല്‍എ ഫണ്ടില്‍നിന്നും ലഭ്യമാക്കുന്നതിന് സര്‍ക്കാര്‍ അനുമതി നല്‍കി. ഇത് സംബന്ധിച്ച്  ജി.ഒ.(സാധാ.)നമ്പര്‍ 4584/2020/ധന ഉത്തരവ് ധനകാര്യവകുപ്പ് പുറപ്പെടുവിച്ചു. നടപ്പ് സാമ്പത്തിക വര്‍ഷം 880 കോടി രൂപയാണ് ചെലവഴിക്കുന്നതിന് അനുമതി ലഭിച്ചിട്ടുള്ളത്. ഇതില്‍ കേന്ദ്ര-സംസ്ഥാന സര്‍ക്കാര്‍ വിഹിതങ്ങള്‍ക്ക് പുറമേ 15 ശതമാനം ഫണ്ട് പഞ്ചായത്ത് വിഹിതമായും 10 ശതമാനം ഫണ്ട് ഗുണഭോകളതൃ വിഹിതമായും കണ്ടെത്തണമെന്നാണ് ജല്‍ജീവന്‍ മിഷന്‍ മാര്‍ഗരേഖയില്‍ നിര്‍ദ്ദേശിക്കുന്നത്.
എന്നാല്‍ ഈ വിഹിതം പല പഞ്ചായത്തുകള്‍ക്കും സമാഹരിക്കാന്‍ കഴിയാതെ വരുന്ന സാഹചര്യം നിലവിലുണ്ട്. ഈ കാലയളവില്‍ മാത്രം 791 പഞ്ചായത്തുകളിലായി 21 ലക്ഷം ഗ്രാമീണ കുടുംമ്പങ്ങളിലാണ് കുടിവെള്ളം പൈപ്പിലൂടെ ലഭ്യമാക്കേണ്ടത്. പദ്ധതിയുടെ സുഗമമായ നടത്തിപ്പിന് ഈ സാഹചര്യം വെല്ലുവിളിയായി മാറി. ഇതു കണക്കിലെടുത്ത് എംഎല്‍എമാരുടെ ആസ്തിവികസന ഫണ്ടില്‍നിന്നും തുക ലഭ്യമാക്കുന്നതിന് അനുമതി നല്‍കണമെന്ന് ഭരണവകുപ്പ് ശുപാര്‍ശ നല്‍കിയിരുന്നു. ഇതിന്റെ അടിസ്ഥാനത്തിലാണ് ധനകാര്യ വകുപ്പ് പുതിയ ഉത്തരവ് പുറപ്പെടുവിച്ചത്.
ഗ്രാമീണ മേഖലയിലെ 52 ലക്ഷം കുടുംബങ്ങളില്‍ പൈപ്പിലൂടെ ശുദ്ധജലമെത്തിക്കുന്നതിനുള്ള ജല്‍ജീവന്‍ മിഷന്‍ കേന്ദ്രസര്‍ക്കാരിന്റെ സഹായത്തോടെയാണ് നടപ്പാക്കുന്നത്. അടുത്ത നൂറു ദിവസങ്ങള്‍ക്കുള്ളില്‍ ഒന്നരലക്ഷം ഗാര്‍ഹിക കുടിവെള്ള കണക്ഷനുകള്‍ നല്‍കാനുള്ള നടപടികള്‍ അതിവേഗം പൂര്‍ത്തിയായി വരുകയാണ്. സാമ്പത്തിക തടസം നീങ്ങിയ സാഹചര്യത്തില്‍ പഞ്ചായത്തു തലത്തില്‍ പദ്ധതിനിര്‍വഹണം വേഗത്തിലാക്കാന്‍ തദ്ദേശസ്വയംഭരണ വകുപ്പു മന്ത്രിയുമായി യോഗം നടത്തി സംയുക്ത തീരുമാനം കൈക്കൊള്ളുമെന്ന് ജലവിഭവ വകുപ്പ് മന്ത്രി കെ. കൃഷ്ണന്‍കുട്ടി അറിയിച്ചു. ഇതിനകം സാങ്കേതിക അനുമതി ലഭിച്ച പദ്ധതികള്‍ ഉടന്‍തന്നെ ടെന്‍ഡര്‍ നടപടികളിലേക്ക് കടക്കുന്നതിനും തീരുമാനമായിട്ടുണ്ട്.
പദ്ധതികളുടെ നിര്‍വഹണ മേല്‍നോട്ടത്തിന് പഞ്ചായത്ത് പ്രസിഡന്റുമാര്‍ അധ്യക്ഷാരായി പഞ്ചായത്തു തല മേല്‍നോട്ട സമിതി രൂപീകരിച്ചു വരുന്നു. 791 പഞ്ചായത്തുകള്‍ക്കാണ് ജലജീവന്‍ പദ്ധതി നിര്‍വഹണത്തിനായി വാട്ടര്‍ അതോറിറ്റി വിശദ എന്‍ജിനീയറിങ് റിപ്പോര്‍ട്ട് നല്‍കിയിട്ടുള്ളത്. ഇതില്‍ 724 പഞ്ചായത്തുകള്‍ പദ്ധതി നടപ്പിലാക്കാന്‍ പ്രമേയം പാസാക്കി. ബാക്കിയുള്ള 67 പഞ്ചായത്തുകളെക്കൂടി പദ്ധതിക്കു കീഴില്‍ കൊണ്ടുവരാന്‍ വാട്ടര്‍ അതോറിറ്റിയുടെ നേതൃത്വത്തില്‍ പഞ്ചായത്ത് ഭാരവാഹികള്‍ക്ക് മാര്‍ഗനിര്‍ദേശക ക്ലാസ് നടത്തിയിരുന്നു. 2020-21ലേക്ക് തയ്യാറാക്കിയ പദ്ധതി പ്രകാരം 586 വില്ലേജുകളിലെയും 380 പഞ്ചായത്തുകളിലെയും 23 ബ്ലോക്ക് പഞ്ചായത്തുകളിലെയും 100 ശതമാനം ഭവനങ്ങള്‍ക്കും കുടിവെള്ള കണക്ഷന്‍നല്‍കാന്‍ കഴിയുമെന്നാണ് പ്രതീക്ഷ. പദ്ധതി നിര്‍വഹണത്തിനായി പഞ്ചായത്തുതലത്തിലും ജില്ലാതലത്തിലും സംസ്ഥാനതലത്തിലുമായി വിവിധ സമിതികള്‍ ഊര്‍ജിതമായ പ്രവര്‍ത്തനം തുടങ്ങിയിട്ടുണ്ട്.:

ജലജീവൻ മിഷൻ: ഗ്രാമപഞ്ചായത്തുകൾ ജൂലൈ 20 നകം ധാരണാപത്രം നൽകണം

ജലജീവൻ മിഷൻ: ഗ്രാമപഞ്ചായത്തുകൾ ജൂലൈ 20 നകം ധാരണാപത്രം നൽകണം

 ഗ്രാമീണ മേഖലകളിൽ കുടിവെള്ളം ഉറപ്പാക്കുന്നത് ലക്ഷ്യമിട്ട് ജലജീവൻ മിഷൻ വഴി കുടിവെള്ള പദ്ധതി നടപ്പാക്കുന്നതിന് ജൂലൈ 20 നകം   ഗ്രാമപഞ്ചായത്തുകൾ പദ്ധതി വിഹിതം നൽകാമെന്നുള്ള ധാരണാപത്രം ജലജീവൻ മിഷന് കൈമാറാൻ ജലവിഭവ വകുപ്പ് മന്ത്രി കെ. കൃഷ്ണൻകുട്ടിയുടെ നേതൃത്വത്തിൽ നടത്തിയ യോഗത്തിൽ തീരുമാനിച്ചു.
2024 ഓടു കൂടി എല്ലാ ഗ്രാമീണ വീടുകളിലും കുടിവെള്ളം ലഭ്യമാക്കുന്നതിന് സംസ്ഥാനമൊട്ടാകെ ജലജീവൻ മിഷൻ  ഗ്രാമ പഞ്ചായത്തുകൾ വഴി  നടപ്പാക്കുന്ന പദ്ധതികളെ സംബന്ധിച്ച് കളക്ടറേറ്റ് കോൺഫറൻസ് ഹാളിൽ നടന്ന യോഗത്തിലാണ് തീരുമാനം.
 ജില്ലയിലെ ഗ്രാമ പഞ്ചായത്ത് പ്രസിഡന്റുമാർ സൂം മീറ്റിങ്ങിലൂടെ യോഗത്തിൽ പങ്കുചേർന്നു.
 കേന്ദ്ര-സംസ്ഥാന സർക്കാരുകളുടെ  സഹായത്തോടെ ജില്ലയിലെ മുഴുവൻ വീടുകളിലും നാലുവർഷത്തിനുള്ളിൽ കുടിവെള്ളം ലഭ്യമാക്കുന്നതിനുള്ള  മികച്ച  അവസരമാണിതെന്ന് മന്ത്രി പറഞ്ഞു. മുഴുവൻ ഗ്രാമപഞ്ചായത്തുകളും ഈ അവസരം ഫലപ്രദമായി വിനിയോഗിക്കണമെന്നും പ്രവർത്തന നടപടികൾ ഉടൻ ആരംഭിക്കണമെന്നും മന്ത്രി ആവശ്യപ്പെട്ടു.  ഇതിനു മുന്നോടിയായി അതത് എംഎൽഎമാരുടെ നേതൃത്വത്തിൽ  മുഴുവൻ ഗ്രാമപഞ്ചായത്തുകളിലെയും ജനപ്രതിനിധികളുടെയും ഉദ്യോഗസ്ഥരുടെയും യോഗം വിളിച്ചു ചേർക്കാൻ തീരുമാനിച്ചു.
തദ്ദേശ സ്വയംഭരണ സ്ഥാപനങ്ങളുടെ പൂർണ ഉത്തരവാദിത്വത്തിൽ ജനപങ്കാളിത്തത്തോടെയും കേരള വാട്ടർ അതോറിറ്റിയുടെ സാങ്കേതിക സഹായത്തോടെയുമാണ് ജല ജീവൻ മിഷൻ പദ്ധതി നടപ്പാക്കുക. ഇതിനായി
ധനനിക്ഷേപത്തിന്റെ 45 ശതമാനവും കേന്ദ്ര സർക്കാരിൽ നിന്നും ജലജീവൻ മിഷനിലൂടെ ലഭിക്കും. ബാക്കിവരുന്ന 45 ശതമാനം സംസ്ഥാന വിഹിതവും 10 ശതമാനം ഗുണഭോക്തൃ  വിഹിതവുമാണ്.

തോളൂരിന്റെ ഗ്രാമ പൊലിമ പദ്ധതി സംസ്ഥാന വെബിനാറിൽ അവതരിപ്പിച്ചു

തോളൂരിന്റെ ഗ്രാമ പൊലിമ പദ്ധതി സംസ്ഥാന വെബിനാറിൽ അവതരിപ്പിച്ചു

പുഴയ്ക്കൽ ബ്ലോക്ക് പഞ്ചായത്തിലെ തോളൂർ ഗ്രാമ പഞ്ചായത്തിന്റെ ‘ഗ്രാമ പൊലിമ’ പദ്ധതി സംസ്ഥാന സർക്കാരിന്റെ ഹരിത കേരളം മിഷൻ നാഷ്ണൽ വെബിനാർ സീരീസിൽ അവതരിപ്പിച്ചു. സുസ്ഥിര വികസനത്തിൽ പ്രാദേശിക ഭരണകൂടങ്ങളുടെ പങ്കിനെ ആസ്പദമാക്കി സംസ്ഥാന സർക്കാർ നടത്തുന്ന വെബിനാർ സീരീസിൽ കേരളത്തിലെ മികച്ച മാതൃകകൾ മാത്രമാണ് അവതരിപ്പിക്കപ്പെട്ടത്. തൃശൂർ ജില്ലയിൽ നിന്ന് തോളൂർ ഗ്രാമപഞ്ചായത്തിനെ മാത്രമാണ് തിരഞ്ഞെടുത്തത്. കേരളത്തിൽ നിന്ന് നാല് ഗ്രാമ പഞ്ചായത്തുകൾ, ഓരോ ബ്ലോക്ക് – ജില്ലാ പഞ്ചായത്തുകൾ എന്നിവ മാത്രമാണ് അവതരണത്തിന് തിരഞ്ഞെടുക്കപ്പെട്ടത്.
‘ജല സംരക്ഷണത്തിൽ പ്രാദേശിക ഭരണകൂടങ്ങളുടെ ഫലപ്രദമായ ഇടപെടലുകൾ’ എന്ന വിഷയത്തെ ആസ്പദമാക്കിയുള്ള വെബിനാർ ജലസേചന വിഭവശേഷി വകുപ്പ് മന്ത്രി കെ കൃഷ്ണൻകുട്ടി ഉദ്ഘാടനം ചെയ്തു. ഹരിത കേരള മിഷന്റെ ജല സംരക്ഷണ പ്രവർത്തനങ്ങൾ ഗ്രാമപഞ്ചായത്തിൽ നടപ്പിൽ വരുത്തുന്നതിന് വേണ്ടി പ്രവർത്തിച്ചു വരുന്ന മിഷനാണ് ഗ്രാമ പൊലിമ. ഗ്രാമപഞ്ചായത്തിലെ കേച്ചേരി പുഴ, കാളിപ്പാടം തോട്, കുളങ്ങൾ എന്നിവയുടെ ശുചീകരണ സംരക്ഷണ പ്രവർത്തനങ്ങളും ഇതിന്റെ ഭാഗമായി നടത്തി വരുന്നുണ്ട്. ജനകീയ പങ്കാളിത്തത്തോടെയും തൊഴിലുറപ്പ് സാധ്യതകൾ ഉപയോഗപ്പെടുത്തിയുമാണ് സംരക്ഷണ പ്രവർത്തനങ്ങൾ നടത്തിവരുന്നത്.
കുടിവെള്ള പദ്ധതികളടക്കം രണ്ട് കോടി രൂപയുടെ ജല സംരക്ഷണ പദ്ധതികളാണ് ത്രിതല പഞ്ചായത്ത് ഫണ്ട്, കേന്ദ്ര – സംസ്ഥാന ഫണ്ട് എന്നിവ ഉപയോഗപ്പെടുത്തി ഗ്രാമ പൊലിമയിലൂടെ സാധ്യമാക്കിയതെന്ന്
പഞ്ചായത്ത് പ്രസിഡന്റ് രാധ രവീന്ദ്രൻ, വൈസ് പ്രസിഡന്റ് അനീഷ് മണാളത്ത് എന്നിവർ അറിയിച്ചു.
ഫോട്ടോ അടിക്കുറിപ്പ്: സംസ്ഥാന സർക്കാരിന്റെ ഹരിത കേരള മിഷൻ സംസ്ഥാന വെബിനാറിൽ തോളൂർ ഗ്രാമ പഞ്ചായത്തിന്റെ ഗ്രാമ പൊലിമ പദ്ധതി അവതരണം വീക്ഷിക്കുന്ന ഭരണ സമിതി അംഗങ്ങൾ.

നാഷണല്‍ ഹൈഡ്രോളജി പ്രൊജക്ട്: കേരളത്തിന് റാങ്കിംഗില്‍ വന്‍ കുതിപ്പ് ; രണ്ടാം സ്ഥാനത്തെത്തി

നാഷണല്‍ ഹൈഡ്രോളജി പ്രൊജക്ട്: കേരളത്തിന് റാങ്കിംഗില്‍ വന്‍ കുതിപ്പ് ; രണ്ടാം സ്ഥാനത്തെത്തി

നാഷണല്‍ ഹൈഡ്രോളജി പ്രൊജക്ടിന്റെ പുതിയ റാങ്കിംഗില്‍ കേരളത്തിന് വന്‍ കുതിപ്പ്. ഏഴാം സ്ഥാനത്ത് നിന്നും അഞ്ച് സ്ഥാനങ്ങള്‍ മെച്ചപ്പെടുത്തി രണ്ടാം സ്ഥാനത്ത് കേരളം എത്തി. ഇന്ന് രാവിലെ കേന്ദ്രസര്‍ക്കാരാണ് പുതിയ റാങ്കിംഗ് പട്ടിക പ്രസിദ്ധീകരിച്ചത്. 2020 ജനുവരിയിലെ റാങ്കിങ്ങിൽ കേരളത്തിന് പതിമൂന്നാം സ്ഥാനത്ത് നിന്നും ഏഴാം സ്ഥാനത്ത് എത്തിയിരുന്നു.
റാങ്കിംഗ് പട്ടികയിൽ കേരളത്തിന് തൊട്ടുമുന്നിലുള്ളത് ദാമോദർ വാലി കോർപ്പറേഷൻ മാത്രമാണ്. വെറും 0.67 പോയിന്റിന്റെ വ്യത്യാസത്തിലാണ് ദാമോദർ വാലി കോർപ്പറേഷൻ ഒന്നാം സ്ഥാനത്ത്  എത്തിയത്.
ഐഡിആര്‍ബി-യുടെ ഹൈഡ്രോളജി വിഭാഗത്തിന്റെ ചിട്ടയായ പ്രവര്‍ത്തനത്തിലൂടെയാണ് ജലസേചന വകുപ്പിന് റാങ്കിംഗില്‍ മുന്നില്‍ എത്താന്‍ കഴിഞ്ഞത്.
ലോകബാങ്ക് സഹായത്തോടെയുള്ള ഈ പദ്ധതിയില്‍ അനുവദിച്ച തുക മുഴുവന്‍ ഗ്രാന്‍ഡായാണ് ലഭിക്കുന്നത്. കേരളം ഉള്‍പ്പെടെയുള്ള സംസ്ഥാനങ്ങളടക്കം 44 ഏജന്‍സികളാണ് നാഷണല്‍ ഹൈഡ്രോളജി പ്രൊജക്ട് ഏറ്റെടുത്ത് നടപ്പാക്കുന്നത്. 2016 ല്‍ ആരംഭിച്ച പദ്ധതി 2024 ലാണ് അവസാനിക്കുന്നത്. എട്ടു വര്‍ഷത്തേക്ക് 44 കോടി രൂപയാണ് കേരളത്തിന് അനുവദിച്ചിട്ടുള്ളത്.
സംസ്ഥാനത്തെ 44 നദികളിലൂടെയും ഒഴുകിപ്പോകുന്ന ജലത്തിന്റെ അളവ് രേഖപ്പെടുത്തല്‍, ഒരു വര്‍ഷം ലഭിക്കുന്ന മഴയുടെ അളവ് രേഖപ്പെടുത്തല്‍, റിയല്‍ ടൈം ഡാറ്റാ കളക്ഷന്‍ തുടങ്ങിയ പ്രവര്‍ത്തനങ്ങളാണ് ഈ പദ്ധതിയില്‍ വരുന്നത്. ജലവിഭവ വിവരങ്ങളുടെ വ്യാപ്തി, ഗുണനിലവാരം, പ്രവേശനക്ഷമത എന്നിവ മെച്ചപ്പെടുത്തുക, വെള്ളപ്പൊക്കത്തിനായുള്ള തീരുമാന പിന്തുണാ സംവിധാനം തയാറാക്കുക, ബേസിന്‍ ലെവല്‍ റിസോഴ്‌സ് അസസ്‌മെന്റ് / പ്ലാനിംഗ്, ടാര്‍ഗെറ്റുചെയ്ത ജലവിഭവ പ്രൊഫഷണലുകളുടെയും മാനേജ്‌മെന്റ് സ്ഥാപനങ്ങളുടെയും ശേഷി ശക്തിപ്പെടുത്തുക, തുടങ്ങിയവയും ഈ പ്രൊജക്ട് ലക്ഷ്യം വയ്ക്കുന്നു.

പ്രളയ പ്രതിരോധ പ്രവര്‍ത്തനങ്ങള്‍ ഏകോപിപ്പിച്ച് നിര്‍വഹിക്കും

പ്രളയ പ്രതിരോധ പ്രവര്‍ത്തനങ്ങള്‍ ഏകോപിപ്പിച്ച് നിര്‍വഹിക്കും

മുന്‍വര്‍ഷങ്ങളില്‍ അനുഭവപ്പെട്ട പ്രളയത്തിന്റെയും കാലാവസ്ഥ പ്രവചനങ്ങളുടെയും അടിസ്ഥാനത്തില്‍ പ്രളയ പ്രതിരോധ പ്രവര്‍ത്തനങ്ങള്‍ പൂര്‍ണതോതില്‍ ഏകോപിപ്പിച്ച് നിര്‍വഹിക്കാന്‍ തീരുമാനം. ജലവിഭവ വകുപ്പ് മന്ത്രി കെ.കൃഷ്ണനന്‍ കുട്ടിയുടെ അധ്യക്ഷതയില്‍ നടന്ന യോഗത്തിലാണ് ഇത് സംബന്ധിച്ച തീരുമാനം കൈക്കൊണ്ടത്. നദീതട അടിസ്ഥാനത്തില്‍ പ്രവര്‍ത്തനങ്ങള്‍ ഏകോപിപ്പിക്കുന്നതിന് ജലസേചന വകുപ്പ് സൂപ്രണ്ടിംഗ് എന്‍ജിനീയര്‍മാരുടെ നേതൃത്വത്തില്‍ രണ്ട് സമിതികള്‍ക്ക് യോഗം രൂപം നല്‍കി. ഒരു നദിയില്‍ വരുന്ന എല്ലാ ഡാമുകളുടേയും പ്രവര്‍ത്തനങ്ങള്‍ ഏകോപിപ്പിച്ച് ജലനിരപ്പ് ക്രമീകരിക്കാനുള്ള ഉത്തരവാദിത്വം ഈ സൂപ്രണ്ടിംഗ് എന്‍ജിനീയര്‍മാര്‍ക്കായിരിക്കും. ഓരോ ഡാമിന്റെയും പ്രത്യേക ചുമതല എക്‌സിക്യുട്ടീവ് എന്‍ജിനീയര്‍മാര്‍ക്കും നല്‍കി. സംസ്ഥാന തലത്തില്‍ ഡാമുകളുടെ പ്രവര്‍ത്തനവുമായി ബന്ധപ്പെട്ട ഏകോപനം ചീഫ് എന്‍ജിനീയര്‍ (ഐഡിആര്‍ബി) നിര്‍വഹിക്കും. ഓരോ ഡാമുകളിലെയും ജലനിരപ്പിന്റെ അളവ്, ആവശ്യാനുസരണം ഡാം ഷട്ടറുകള്‍ എപ്പോഴെല്ലാം തുറക്കണം തുടങ്ങിയ കാര്യങ്ങള്‍ അതത് ജില്ലാ കളക്ടര്‍മാരുമായി സംസാരിച്ച് ഏകോപിപ്പിക്കുക നിരീക്ഷണ സമിതി ആയിരിക്കും. ഓരോ നദീതടത്തിലും വരുന്ന റെഗുലേറ്ററുകളുടെ പ്രവര്‍ത്തനം ഏകോപിപ്പിക്കുന്നതിന് സൂപ്രണ്ടിംഗ് എന്‍ജിനീയറുടെ ചുമതലയില്‍ രണ്ടാമതൊരു സമിതിയും പ്രവര്‍ത്തിക്കും. ജില്ലാ തലത്തിലെ ചുമതല ബന്ധപ്പെട്ട എക്‌സിക്യുട്ടീവ് എന്‍ജിനീയര്‍മാര്‍ക്കായിരിക്കും. സംസ്ഥാനാടിസ്ഥാനത്തിലെ ഏകോപന ചുമതല ചീഫ് എന്‍ജിനീയര്‍ (ജലസേചനവും ഭരണവും)ക്ക് ആണ്. മേല്‍പറഞ്ഞ രണ്ട് തലത്തിലുള്ള മേഖലാസമിതികളും പരസ്പര പൂരകങ്ങളായി ജലസേചന വകുപ്പിന്റെ പ്രളയ പ്രതിരോധ പ്രവര്‍ത്തനങ്ങള്‍ ഏകോപിപ്പിക്കും. സൂപ്രണ്ടിംഗ് എന്‍ജിനീയര്‍മാരുടെ നേതൃത്വത്തില്‍ എല്ലാ എക്‌സിക്യുട്ടീവ് എന്‍ജിനീയര്‍മാരുടെയും യോഗം കഴിഞ്ഞദിവസം വീഡിയോ കോണ്‍ഫറന്‍സിംഗിലൂടെ നടത്തി നിര്‍ദ്ദേശങ്ങള്‍ നല്‍കിയിട്ടുണ്ട്. ഈ യോഗത്തിന്റെ റിപ്പോര്‍ട്ടും ജില്ലാ അടിസ്ഥാനത്തിലെ എമര്‍ജന്‍സി ടാസ്‌ക് ഫോഴ്‌സിന്റെ രൂപരേഖയും അതത് ജില്ലാ കളക്ടര്‍മാര്‍ക്കും മേലുദ്യോഗസ്ഥര്‍ക്കും കൈമാറിയിട്ടുണ്ട്. നദികളുടെ സുഗമമായ ഒഴുക്കിന് തടസം സൃഷ്ടിക്കുന്ന മണ്‍കൂനകള്‍ സംബന്ധിച്ച വിശദമായ റിപ്പോര്‍ട്ട് കളക്ടര്‍മാര്‍ക്ക് നല്‍കും. ഇവ നീക്കംചെയ്യാനുള്ള നടപടികള്‍ അടിയന്തരമായി സ്വീകരിക്കുന്നതിനും കളക്ടര്‍മാരോട് ശുപാര്‍ശ ചെയ്യാനും യോഗം തീരുമാനിച്ചു.

പ്രളയനിയന്ത്രണം: നദീതടാടിസ്ഥാനത്തില്‍ നിരീക്ഷണ സമിതികള്‍ രൂപീകരിക്കും; അടിയന്തര പ്രവൃത്തികള്‍ക്ക് 30 ലക്ഷം രൂപ വീതം

പ്രളയനിയന്ത്രണം: നദീതടാടിസ്ഥാനത്തില്‍ നിരീക്ഷണ സമിതികള്‍ രൂപീകരിക്കും; അടിയന്തര പ്രവൃത്തികള്‍ക്ക് 30 ലക്ഷം രൂപ വീതം

പ്രളയ പ്രതിരോധത്തിനായി സംസ്ഥാനത്ത് പെയ്യുന്ന മഴയുടെ അടിസ്ഥാനത്തില്‍ ഡാമുകളിലെ ജലസംഭരണവും തുറന്നുവിടലും ക്രമീകരിക്കുന്നതിന് നദീതട അടിസ്ഥാനത്തില്‍ നിരീക്ഷണ സമിതികള്‍ രൂപീകരിക്കും. ജലവിഭവ വകുപ്പ് മന്ത്രി കെ. കൃഷ്ണന്‍കുട്ടിയുടെ അധ്യക്ഷതിയില്‍ ചേര്‍ന്ന ജലവിഭവ വകുപ്പ് സെക്രട്ടറി, ചീഫ് എന്‍ജിനീയര്‍മാര്‍ എന്നിവരുടെ യോഗത്തിലാണ് തീരുമാനം കൈക്കൊണ്ടത്. ജലസേചന വകുപ്പ് സൂപ്രണ്ടിംഗ് എന്‍ജിനീയര്‍ നേതൃത്വത്തില്‍ എക്‌സിക്യുട്ടീവ് എന്‍ജിനീയര്‍മാരായിരിക്കും ഈ നിരീക്ഷണ സമിതികളുടെ പ്രവര്‍ത്തനം മുന്നോട്ടു കൊണ്ടുപോകുക. സമായാസമയങ്ങളില്‍ യോഗം ചേരുകയും ലഭിക്കുന്ന മഴ, കാലാവസ്ഥ പ്രവചനം അനുസരിച്ച ലഭിച്ചേക്കാവുന്ന മഴ തുടങ്ങിയവ വിശകലനം ചെയ്ത് തുറന്നുവിടേണ്ട ജലത്തിന്റെ അളവ് നിശ്ചയിക്കുകയും ചെയ്യുക ഈ നിരീക്ഷണ സമിതികളായിരിക്കും. നിരീക്ഷണ വിവരങ്ങള്‍ കൃത്യമായി മേലധികാരികള്‍ക്ക് നല്‍കുന്നതിനൊപ്പം പൊതുജനങ്ങള്‍ക്ക് ലഭിക്കുന്നതിനായി ഐഡിആര്‍ബിയുടെ വെബ്‌സൈറ്റിലും അപ്‌ലോഡ് ചെയ്യും.പ്രളയം നേരിടുന്നതിനുള്ള മുന്നൊരുക്കത്തിന്റെ ഭാഗമായി ഡാമുകളിലെയും റെഗുലേറ്ററുകളിലെയും ജലത്തിന്റെ ഒഴുക്ക് തടസപ്പെടാതിരിക്കാനുള്ള അടിയന്തര പ്രവൃത്തികള്‍ക്കായി ജലസേചന വകുപ്പിലെ എക്‌സിക്യുട്ടീവ് എന്‍ജിനീയര്‍മാര്‍ക്ക് 30 ലക്ഷം രൂപ വീതം അനുവദിക്കാനും യോഗത്തില്‍ തീരുമാനമായി. സംസ്ഥാനത്താകെ 24 എക്‌സിക്യുട്ടീവ് എന്‍ജിനീയര്‍മാര്‍ക്കാണ് ഈ തുക അനുവദിച്ചത്. മുന്‍കൂര്‍ പണം ലഭ്യമാക്കുന്നതിനാല്‍ അടിയന്തര പ്രവൃത്തികള്‍ക്ക് അനുമതി തേടി പണം അനുവദിച്ചുവരുന്നതുവരെയുള്ള കാലതാമസം ഒഴിവാക്കാനാവും. ഡാമുകളിലെയും റെഗുലേറ്ററുകളിലെയും അത്യാവശ്യ പ്രവൃത്തികള്‍, ജലത്തിന്റെ സുഗമമായ ഒഴുക്ക് ഉറപ്പാക്കല്‍, ഒടിഞ്ഞുവീണ മരങ്ങളും മറ്റും നീക്കം ചെയ്യല്‍ തുടങ്ങിയ പ്രവൃത്തികള്‍ ഇതില്‍ ഉള്‍പ്പെടും. മലങ്കര ഡാമിന്റെ ഷട്ടറുകള്‍ ഉയര്‍ത്തിയിട്ടുണ്ട്. കല്ലട, പീച്ചി എന്നീ ഡാമുകളുടെ ജല നിരപ്പ് മഴക്കാലത്തിനു മുന്‍പായി ഉയരുകയാണെങ്കില്‍ നിയന്ത്രിക്കുവാനായി ജലം തുറന്നുവിടേണ്ടിവരും. ഇക്കാര്യം ജില്ലാ ഭരണാധികാരികളുമായി ചര്‍ച്ച ചെയ്ത് തീരുമാനിക്കാന്‍ ഡാം എന്‍ജിനീര്‍മാരോട് നിര്‍ദ്ദേശിച്ചിട്ടുണ്ട്. എല്ലാ ദിവസവും രാവിലെ 8 മണി, ഉച്ചയ്ക്ക് 12 മണി, വൈകിട്ട് 4 മണി എന്നീ സമയങ്ങളില്‍ ഡാമുകളിലെ ജല നിരപ്പ് രേഖപ്പെടുത്തും. ഇവരുടെ ഉപയോഗത്തിനായി സാറ്റ്‌ലൈറ്റ് ഫോണ്‍ നല്‍കിക്കഴിഞ്ഞു.
വകുപ്പിന് കീഴിലുള്ള ഡാമുകളില്‍ സുരക്ഷാ പരിശോധനകള്‍ പൂര്‍ത്തിയാക്കുകയും മഴക്കാലത്ത് സ്വീകരിക്കേണ്ട മുന്‍കരുതലുകള്‍ സംബന്ധിച്ച നിര്‍ദ്ദേശങ്ങളും ഡാം എന്‍ജിനീര്‍മാര്‍ക്ക് കൈമാറുകയും ചെയ്തു. ഡാം ഗേറ്റുകളുടെ പ്രവര്‍ത്തനക്ഷമമാണെന്ന് ഉറപ്പുവരുത്തിവരുന്നു. അടിയന്തിര സാഹചര്യങ്ങളില്‍ ഗേറ്റ് ഓപ്പറേറ്റ് ചെയ്യുന്നതിനായി ഡി.ജി സെറ്റുകള്‍ ലഭ്യമാക്കുന്നതിനും തീരുമാനിച്ചിട്ടുണ്ടെന്ന് ജലവിഭവ വകുപ്പ് മന്ത്രി കെ. കൃഷ്ണന്‍കുട്ടി അറിയിച്ചു.

കുടിവെള്ളത്തിനായി കയ്പമംഗലത്ത് ഇനി മണിമുഴക്കം

കുടിവെള്ളത്തിനായി കയ്പമംഗലത്ത് ഇനി മണിമുഴക്കം

കയ്പമംഗലത്തെ സ്‌കൂളുകളിൽ കുടിവെള്ളത്തിനായി ഇനി മണി മുഴങ്ങും. വേനൽ രൂക്ഷമായ സാഹചര്യം കണക്കിലെടുത്ത് പൊതു വിദ്യാദ്യാസ സംരക്ഷണ യജ്ഞത്തിന്റെ ഭാഗമായി മണ്ഡലത്തിലെ മുഴുവൻ സ്‌കൂളുകളിലും വാട്ടർ ബെൽ ക്യാമ്പെയിൻ ആരംഭിക്കുന്നത്തിന്റെ ഭാഗമാണ് ഈ മണിമുഴക്കം. രാവിലെ 11.30 നും ഉച്ചയ്ക്ക് 2.30 നുമാണ് കുടിവെള്ളത്തിനായി ഒരു സ്പെഷ്യൽ വാട്ടർ ബെൽ മുഴങ്ങുക. കുട്ടികൾ സ്‌കൂളിലേക്ക് കൊണ്ടുവരുന്ന കുടിവെള്ളം വേണ്ടത്ര കുടിക്കാതെ വീട്ടിലേക്ക് തന്നെ തിരിച്ചു കൊണ്ടു പോകുന്നത് ശ്രദ്ധയിൽപ്പെട്ടതിനെ തുടർന്നാണ് ഈ പദ്ധതി എംഎൽഎ ഇ ടി ടൈസൺ മാസ്റ്ററുടെ നേതൃത്വത്തിൽ നടപ്പാക്കുന്നത്. ആവശ്യത്തിന് വെള്ളം കുടിച്ചില്ലെങ്കിൽ കുട്ടികൾക്കുണ്ടാകുന്ന ആരോഗ്യപ്രശ്നങ്ങൾ ഒഴിവാക്കുന്നതിനുവേണ്ടിയാണ് നിയോജക മണ്ഡലത്തിലെ എല്ലാ വിദ്യാലയങ്ങളിലും പദ്ധതി നടപ്പാക്കുന്നത്. ബെൽ കേൾക്കുമ്പോൾ അദ്ധ്യായനം നടത്തുന്ന അധ്യാപകരും വിദ്യാർത്ഥികളും ഒരുമിച്ച് വെള്ളം കുടിക്കണം. കുട്ടികളും അധ്യാപകരും വീട്ടിൽ നിന്ന് വെള്ളം കൊണ്ടുവരുന്നതോടൊപ്പം വിദ്യാലയങ്ങളിലെല്ലാം കുടിവെള്ളം ലഭിക്കുന്നുണ്ടെന്ന് ഉറപ്പുവരുത്തണമെന്നും ക്യാമ്പെയിൻ ആവശ്യപ്പെടുന്നു.

പ്രളയ സാധ്യതാ മേഖലകളിൽ പ്രളയത്തോടൊത്തു പോകുന്ന വികസന ശൈലി രൂപപ്പെടുത്തണം: മുഖ്യമന്ത്രി

പ്രളയ സാധ്യതാ മേഖലകളിൽ പ്രളയത്തോടൊത്തു പോകുന്ന വികസന ശൈലി രൂപപ്പെടുത്തണം: മുഖ്യമന്ത്രി

പ്രളയ സാധ്യതാ മേഖലകളിൽ പ്രളയത്തോടൊത്തു പോകുന്ന വികസന ശൈലിയാണ് വേണ്ടതെന്ന് മുഖ്യമന്ത്രി പിണറായി വിജയൻ പറഞ്ഞു. ജപ്പാൻ സ്വീകരിച്ച മാതൃക ഇക്കാര്യത്തിൽ പിന്തുടരാവുന്നതാണ്. താഴ്ന്നതും ഉയർന്നതുമായ പ്രദേശങ്ങളെ ശരിയായ വിധത്തിൽ ക്രമീകരിച്ചാണ് ജപ്പാൻ വെള്ളപ്പൊക്കത്തെ നേരിടുന്നത്. ഉയർന്ന സ്ഥലത്താണ് കൃഷിയുൾപ്പെടെയുള്ള കാര്യങ്ങൾ ചെയ്യുന്നതെന്ന് മുഖ്യമന്ത്രി പറഞ്ഞു. പ്രളയ നിവാരണവുമായി ബന്ധപ്പെട്ട് എൻ. എച്ച്. പിയും ഡ്രിപ്പും സംയുക്തമായി സംഘടിപ്പിച്ച ദേശീയ കോൺഫറൻസ് ഉദ്ഘാടനം ചെയ്യുകയായിരുന്നു അദ്ദേഹം.

പ്രളയജല നിയന്ത്രണത്തിനും ശാസ്ത്രീയ ജല മാനേജ്‌മെന്റിനും വേണ്ട നയം രൂപീകരിക്കുമ്പോൾ നാട്ടിലെ പരമ്പരാഗത അറിവുകളും പ്രാദേശിക സവിശേഷതകളും പരിഗണിച്ചായിരിക്കണം പരിഹാരമാർഗങ്ങൾ നിശ്ചയിക്കേണ്ടത്. സംസ്ഥാനത്തുടനീളം ഒറ്റ പരിഹാരം നിർദ്ദേശിക്കാനാവില്ല. ശാസ്ത്രീയ ജല മാനേജ്‌മെന്റിന്റെ അഭാവമാണ് കേരളത്തിലെ ദുരന്തങ്ങൾക്ക് കാരണമെന്നാണ് വിദഗ്ധരുടെ അഭിപ്രായം. പുഴയ്ക്ക് സ്വാഭാവിക ഒഴുക്ക് മടക്കി നൽകുന്ന റൂം ഫോർ റിവർ ആശയത്തിന് നല്ല പരിഗണന നൽകണം. മൺസൂൺ കാലത്ത് വെള്ളം കയറുന്ന സ്ഥലങ്ങളിൽ നിന്ന് ജനങ്ങളെ മാറ്റിത്താമസിപ്പിക്കണം. അവരുടെ ഭൂമി അവിടെത്തന്നെ നിലനിർത്തുകയും താമസം മറ്റൊരിടത്താക്കുകയുമാണ് വേണ്ടത്. സമുദ്രനിരപ്പിനേക്കാൾ താഴ്ന്ന കുട്ടനാട് പോലെയുള്ള പ്രദേശങ്ങളിൽ കഴിയുന്നവർ എല്ലാ മഴക്കാലത്തും ദുരിതത്തിലാവുന്നു. ഇവർക്ക് പ്രത്യേക പരിശീലനം നൽകേണ്ടത് പ്രധാനമാണ്. അവിചാരിതമായി ഉണ്ടാവുന്ന പ്രളയ സമയത്ത് താമസിക്കാൻ ഇവർക്കായി ഷെൽട്ടറുകളും ഒരുക്കണം. ഒപ്പം ആരോഗ്യ സംരക്ഷണത്തിന് ഉതകുന്ന കാര്യങ്ങളും പരിഗണിക്കണം. നദികളും നീരൊഴുക്കുള്ള ചാലുകൾ കൈയേറിയുള്ള അനധികൃത നിർമാണങ്ങളുടെ കാര്യത്തിൽ ഒരുതരത്തിലുമുള്ള ദാക്ഷണ്യവും ഉണ്ടാവില്ല. ഇവയെല്ലാം നീക്കം ചെയ്യണം. സ്വാഭാവിക തണ്ണീർത്തടങ്ങൾക്ക് പ്രളയജല സംഭരണത്തിൽ പ്രധാന പങ്ക് വഹിക്കാനാവും. ഇവയെ സംരക്ഷിക്കുകയും ജലസംഭരണ ശേഷി ഉയർത്തുകയും വേണം. പുഴകളെയും തണ്ണീർത്തടങ്ങളെയും ബന്ധിപ്പിക്കുന്ന ചാലുകൾ വൃത്തിയായി സൂക്ഷിക്കണം. നദികളുൾപ്പെടെയുള്ള ജലസ്രോതസുകൾ മാലിന്യമുക്തമാക്കണം. ഇതിനായി ഹരിത കേരള മിഷൻ നടപടി സ്വീകരിക്കുന്നുണ്ട്. ഇതിൽ എല്ലാ ജനങ്ങളും പങ്കാളികളാവണം. മഴക്കാലത്ത് വെള്ളം ശരിയായി ഒഴുകുന്ന അവസ്ഥ സൃഷ്ടിക്കണം. സ്വാഭാവിക തീരം അടയാളപ്പെടുത്തി സംരക്ഷിക്കുന്ന നിലയുണ്ടാവണമെന്ന് മുഖ്യമന്ത്രി പറഞ്ഞു.

നദീതട പദ്ധതികൾ അടിയന്തരമായി നടപ്പാക്കേണ്ടതുണ്ടെന്ന് ചടങ്ങിൽ അധ്യക്ഷത വഹിച്ച ജലവിഭവ മന്ത്രി കെ. കൃഷ്ണൻകുട്ടി പറഞ്ഞു. കേരളത്തിന്റെ പരിസ്ഥിതിക്ക് അനുസരിച്ച് പദ്ധതികൾ നടപ്പാക്കണം. ഭൂജലചൂഷണത്തിന്റെ അനന്തരഫലമാണ് പരിസ്ഥിതി പ്രശ്‌നങ്ങൾ. കാലാവസ്ഥ വ്യതിയാനവും ആഗോളതാപനവും കേരളത്തിന്റെ സ്വാഭാവിക പരിസ്ഥിതിക്ക് വലിയ മാറ്റം സൃഷ്ടിക്കുന്നു. ജലവിഭവ സമ്പത്തിൽ വരുന്ന മാറ്റം നാം കണക്കിലെടുക്കണം. ജലബഡ്ജറ്റ് നടപ്പാക്കാനുള്ള നടപടികൾ പുരോഗമിക്കുകയാണെന്ന് മന്ത്രി പറഞ്ഞു. അഡീഷണൽ ചീഫ് സെക്രട്ടറി വിശ്വാസ് മെഹ്ത്ത, കേന്ദ്ര ജൽശക്തി മന്ത്രാലയം അഡീഷണൽ സെക്രട്ടറി ടി. രാജേശ്വരി, ജലവിഭവ വകുപ്പ് സെക്രട്ടറി ബി.അശോക് എന്നിവർ സംസാരിച്ചു.

പ്രളയ പ്രതിരോധ സംസ്ഥാന നയരൂപീകരണം: ദ്വിദിന ദേശീയ സെമിനാര്‍ ജനുവരി 23, 24 തീയതികളില്‍ തിരുവനന്തപുരത്ത്

പ്രളയ പ്രതിരോധ സംസ്ഥാന നയരൂപീകരണം: ദ്വിദിന ദേശീയ സെമിനാര്‍ ജനുവരി 23, 24 തീയതികളില്‍ തിരുവനന്തപുരത്ത്

പ്രളയ പ്രതിരോധം സംബന്ധിച്ച സംസ്ഥാന നയരൂപീകരണത്തിന്റെ ഭാഗമായി ജലസേചന വകുപ്പ് ദ്വിദിന ദേശീയ സമ്മേളനം തിരുവനന്തപുരത്ത് സംഘടിപ്പിക്കുന്നു. 2020 ജനുവരി 23, 24 തീയതികളില്‍ ആക്കുളം ഹോട്ടല്‍ ഒ ബൈ താമരയില്‍ നടക്കുന്ന ദേശീയ സെമിനാര്‍ മുഖ്യമന്ത്രി ശ്രീ. പിണറായി വിജയന്‍ ഉദ്ഘാടനം ചെയ്യും. നയ നിര്‍മാതാക്കള്‍, എന്‍ജിനീയര്‍മാര്‍, പ്രകൃതി – സാമൂഹിക ശാസ്ത്രജ്ഞര്‍, ദുരന്ത നിവാരണ മേഖലയിലെ വിദഗ്ദര്‍, ഗവേഷകര്‍ എന്നിവരുള്‍പ്പെടെ വിവിധ മേഖലകളില്‍ നിന്നുളള പ്രമുഖര്‍ ആശയങ്ങളും അനുഭവങ്ങളും പങ്കുവെയ്ക്കും. നെതര്‍ലാന്‍ഡിന്റെ ജല ഉപദേശകന്‍ പോള്‍ വാന്‍ മീല്‍, ചൈനയിലെ ഷെന്‍സെന്‍ വാട്ടര്‍ പ്ലാനിംഗ് ആന്‍ഡ് ഡിസൈന്‍ ഇന്‍സ്റ്റിറ്റ്യൂട്ടിലെ സീനിയര്‍ എന്‍ജിനീയര്‍ സുന്‍ സിയാങ്, ആര്‍ടിഐ ഇന്റര്‍നാഷണലിലെ പ്രമുഖ എന്‍ജിനീയറായ ഡോ. ജോനാഥന്‍ ക്യൂബെമാന്‍, അമേരിക്കയിലെ നാഷണല്‍ സെന്റര്‍ ഫോര്‍ അറ്റ്‌മോസ്ഫറിക് റിസര്‍ച്ചിലെ ശാസ്ത്രജ്ഞന്‍ ഡേവിസ് യേറ്റ്‌സ്, കേന്ദ്ര ജലശക്തി മന്ത്രിയത്തിന്റെ കമാന്‍ഡ് ഏര്യ ജവലപ്‌മെന്റ് കമ്മീഷണര്‍ ഡോ. ബി.ആര്‍.കെ. പിള്ള, വെറ്റ്ലാന്‍ഡ്സ് ഇന്റര്‍നാഷണല്‍ സൗത്ത് ഏഷ്യ ഡയറക്ടര്‍ റിതേഷ്‌കുമാര്‍, ഗവേണിംഗ് ബോഡി അംഗം ഡോ. ഇ.ജെ. ജയിംസ്, ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ട്രോപ്പിക്കല്‍ മെറ്റീരിയോളജിയിലെ സീനിയര്‍ ശാസ്ത്രജ്ഞന്‍ ഡോ. പി. മുഖോപാദ്ധ്യായ തുടങ്ങിയ പ്രമുഖരും സെമിനാറില്‍ സജീവമാകും. മറ്റ് രാജ്യങ്ങളില്‍ വിജയകരമായി പിന്തുടരുന്ന നൂതന ആശയങ്ങളായ സ്പോഞ്ച് സിറ്റി (ചൈന), റൂം ഫോര്‍ റിവര്‍ (നെതര്‍ലാന്‍ഡ്) എന്നിവയും വേദിയില്‍ അവതരിപ്പിക്കപ്പെടും. ലോക ബാങ്ക് ധന സഹായത്തോടെ കേന്ദ്ര ജലകമ്മിഷന്‍ നടപ്പിലാക്കി വരുന്ന നാഷണല്‍ ഹൈഡ്രോളജി പ്രോജക്ട് (എന്‍എച്ച്പി), ഡാം റീഹാബിലിറ്റേഷന്‍ ആന്‍ഡ് ഇംപ്രൂവ്മെന്റ് പ്രോജക്ട് (ഡ്രിപ്), എന്നിവയുടെ ഭാഗമായിട്ടാണ് സാങ്കേതിക സമ്മേളനം സംഘടിപ്പിച്ചിരിക്കുന്നത്. കാലാവസ്ഥാ വ്യതിയാന കാലത്തെ പ്രളയ നിയന്ത്രണം, ഫ്ളഡ് റിസ്‌ക് മാനേജ്മെന്റ്, സമഗ്ര ജലവിഭവ മാനേജ്മെന്റ്, ഫ്ളഡ് സോണേഷന്‍ ആന്‍ഡ് ഹസാര്‍ഡ് മാപ്പിംഗ്, റിസര്‍വോയറുകളുടെ സംയോജിത പ്രവര്‍ത്തനം, വിവിധോദ്ദേശ്യ പ്രളയ പ്രതിരോധ അണക്കെട്ടുകള്‍ എന്നീ മേഖലകളിലെ നൂതന വിഷയങ്ങളെക്കുറിച്ചും സാങ്കേതിക സംഭവ വികാസങ്ങളെക്കുറിച്ചും ജലവിഭവ മാനേജ്മെന്റ് മേഖലയിലെ വിദഗ്ധരുടെ സാങ്കേതിക അവതരണങ്ങള്‍ ഉണ്ടായിരിക്കും. സാങ്കേതിക അവതരണത്തിനു ശേഷം പ്രളയ പ്രതിരോധ ശേഷിയുളള കേരള സംസ്ഥാന നയ രൂപീകരണത്തിനുവേണ്ടി ആശയങ്ങള്‍ പങ്കിടുന്നതിന് വിദഗ്ധ പാനല്‍ നയിക്കുന്ന ബ്രെയിന്‍ സ്റ്റോമിംഗ് സെക്ഷനും ഉണ്ടാകും. മുന്നൂറോളം പ്രതിനിധികളാണ് സമ്മേളനത്തില്‍ പങ്കെടുക്കുന്നത്. ഇതിനോടനുബന്ധിച്ച് ജലവിഭവ മേഖലയുമായി ബന്ധപ്പെട്ട പ്രദര്‍ശനം സംഘടിപ്പിക്കുന്നുണ്ട്. ജല അതോറിട്ടി അടക്കമുള്ള അനുബന്ധ വകുപ്പുകളാണ് പ്രദര്‍ശനം ഒരുക്കുന്നത്. പി.ജി. / ഗവേഷക വിദ്യാര്‍ത്ഥികളുടെ പോസ്റ്റര്‍ അവതരണ മത്സരവും നടത്തും.
കേരളത്തിലെ 44 നദികളുടേയും ആകെ ജലസമ്പത്ത് 2756 ടിഎംസി ആണ്. സംസ്ഥാനത്തിന്റെ വൃഷ്ടി പ്രദേശങ്ങളില്‍ നിന്നുള്ള ജലസമ്പത്ത് 2484 ടിഎംസിയും ഉപയോഗയുക്തമായ വെള്ളത്തിന്റെ അളവ് 1510 ടിഎംസിയും ആണ്. 2030 ആകുമ്പോള്‍ നമ്മുടെ ജല ആവശ്യകത ഏകദേശം 1000 ടിഎംസി ജലമാകും. നിലവില്‍ 300 ടിഎംസി മാത്രമേ ഉപയോഗിക്കപ്പെടുന്നുള്ളൂ. 22 ലക്ഷം ഹെക്ടര്‍ കൃഷിഭൂമി കേരളത്തിലുണ്ട്. എന്നാല്‍ നാല് ലക്ഷം ഹെക്ടര്‍ പ്രദേശത്തു മാത്രമേ നിലവില്‍ ജലസേചന സൗകര്യമുള്ളൂ. സംസ്ഥാനത്തൊട്ടാകെ 86 ലക്ഷം ഭവനങ്ങളിലാണ് പൈപ്പിലൂടെ കുടിവെള്ളമെത്തിക്കേണ്ടത്. പക്ഷേ, 25 ലക്ഷം ഭവനങ്ങളില്‍ മാത്രമേ ഇപ്പോള്‍ പൈപ്പിലൂടെ കുടിവെള്ളം വിതരണം ചെയ്യുന്നുള്ളൂ. ആയതിനാല്‍ സമഗ്രമായ ജലപരിപാലനത്തിന് വിശദമായ നദീതടപദ്ധതികള്‍ കൂടിയേ കഴിയൂവെന്നതാണ് നിലവിലെ അവസ്ഥ. ഈ സാഹചര്യത്തിലാണ് അതിന് അനുഗുണമായ നയരൂപീകരണം അടക്കമുള്ള വിഷയങ്ങളുമായി ജലസേചന വകുപ്പ് മുന്നോട്ട് പോകുന്നത്.
Skip to content