Loading

Archive

Day: October 16, 2019

3 posts

25 ലക്ഷം കണക്ഷനുകള്‍ പൂര്‍ത്തിയാക്കി ജല അതോറിട്ടി

25 ലക്ഷം കണക്ഷനുകള്‍ പൂര്‍ത്തിയാക്കി ജല അതോറിട്ടി

പാലക്കാട് സോളാര്‍ പ്ലാന്റ് അടുത്ത ഓഗസ്റ്റില്‍ കമ്മിഷന്‍ ചെയ്യും

സംസ്ഥാനത്ത് ജല അതോറിട്ടി നല്‍കുന്ന ശുദ്ധജല കണക്ഷനുകളുടെ എണ്ണം 25 ലക്ഷം കവിഞ്ഞു. കഴിഞ്ഞ ആറ് മാസത്തിനിടെ 80,894 പുതിയ കണക്ഷനുകള്‍കൂടി നല്‍കിയാണ് ഈ ലക്ഷ്യം ജല അതോറിട്ടി കൈവരിച്ചത്. ജലവിഭവ വകുപ്പ് മന്ത്രി കെ. കൃഷ്ണന്‍കുട്ടിയുടെ അധ്യക്ഷതയില്‍ ചേമ്പറില്‍ ചേര്‍ന്ന പദ്ധതികളുടെ അവലോകന യോഗത്തിലാണ് ഇക്കാര്യം അറിയിച്ചത്.
ഗാര്‍ഹിക, ഗാര്‍ഹികേതര, വ്യാവസായിക, മറ്റുള്ളവ എന്നീ വിഭാഗങ്ങളിലായി 25,20,963 കണക്ഷനുകളാണ് ഇപ്പോള്‍ നല്‍കിയിട്ടുള്ളത്. ഈ സാഹചര്യത്തില്‍ നടപ്പ് വര്‍ഷം നല്‍കാന്‍ ലക്ഷ്യമിടുന്ന കണക്ഷന്റെ എണ്ണം മൂന്ന് ലക്ഷമാക്കി വര്‍ധിപ്പിക്കാനും യോഗത്തില്‍ ധാരണയായി. നിലവില്‍ 23,51,089 കുടുംബങ്ങള്‍ക്ക് ശുദ്ധജലം പൈപ്പിലൂടെ ജല അതോറിട്ടി നല്‍കുന്നുണ്ട്. ഗാര്‍ഹികേതര വിഭാഗത്തില്‍ 1,51,515 കണക്ഷനുകളാണ് ഇപ്പോള്‍ ലഭ്യമാക്കിയിട്ടുള്ളത്. വ്യാവസായിക കണക്ഷന്‍ 2014 ആയി ഉയര്‍ന്നു. മറ്റ് വിഭാഗങ്ങളിലായി 16,345 കണക്ഷനും നല്‍കുന്നുണ്ട്.
പാലക്കാട് ചിറ്റൂരിലെ മങ്കള്‍മടയില്‍ 40 ഏക്കറില്‍ പരം പ്രദേശത്ത് ജല അതോറിട്ടി സോളാര്‍ പാനലുകള്‍ സ്ഥാപിക്കും. 2021 ഓഗസ്റ്റ് 15ന് പദ്ധതി കമ്മിഷന്‍ ചെയ്യുന്ന വിധത്തിലാണ് പദ്ധതി തയാറാക്കിയിട്ടുള്ളത്. ഇത് സംബന്ധിച്ച് അനെര്‍ട്ടുമായി ഈ ആഴ്ച കരാര്‍ ഒപ്പുവയ്ക്കും. ഇവിടെ ഉത്പാദിപ്പിക്കുന്ന വൈദ്യുതി കെ.എസ്.ഇബിക്ക് കൈമാറും. 50 കോടി രൂപയാണ് ചെലവ് പ്രതീക്ഷിക്കുന്നത്. ഇതടക്കം ഊര്‍ജ്ജ സംരക്ഷണത്തിനായി 256.60 കോടിയുടെ പദ്ധതികളാണ് റീബില്‍ഡ് കേരളയ്ക്ക് കീഴില്‍ അതോറിട്ടി വിഭാവനം ചെയ്യുന്നത്. പ്രളയ ബാധിത മേഖലകളിലെ ജനങ്ങള്‍ക്കായി 182.60 കോടി രൂപ ചെലവുവരുന്ന ഏഴ് കുടിവെള്ള വിതരണ പദ്ധതികളും ഇതില്‍ ഉള്‍പ്പെടുന്നു.
ജല അതോറിട്ടി നിലവില്‍ 28,882.29 കോടിയുടെ 719 പദ്ധതികളാണ് നടപ്പിലാക്കിവരുന്നത്. ഇതില്‍ 118 പദ്ധതികള്‍ മൂന്ന് മാസംകൊണ്ടും 285 പദ്ധതികള്‍ ഒരു വര്‍ഷംകൊണ്ടും 149 പദ്ധതികള്‍ രണ്ടുവര്‍ഷംകൊണ്ടും നടപ്പാക്കുന്നവയാണ്. അഞ്ച് വര്‍ഷംകൊണ്ട് പൂര്‍ത്തിയാക്കുന്ന 167 പദ്ധതികളുമുണ്ട്. കേന്ദ്രസര്‍ക്കാരിന്റെ ജല്‍ജീവന്‍ മിഷന് കീഴില്‍ നടപ്പാക്കേണ്ട പദ്ധതികളുടെ അന്തിമരൂപമായി വരുന്നു. ഈ പദ്ധതിക്ക് കീഴില്‍ ഗ്രാമപഞ്ചായത്തുകളുമായി സഹകരിച്ച് വീടുകളില്‍ ശുദ്ധജലമെത്തിക്കുന്നതിനും ലക്ഷ്യമിടുന്നുണ്ട്. അഞ്ച് ഗ്രാമ പഞ്ചായത്തുകളുമായി ഇത് സംബന്ധിച്ച് ധാരണയായിട്ടുണ്ട്.
ജല അതോറിട്ടിയുടെ പ്രവര്‍ത്തന ചെലവ് കുറയ്ക്കുന്നതിനും കാര്യക്ഷമത വര്‍ധിപ്പിക്കുന്നതിനും കൂടുതല്‍ നടപടികള്‍ ഉണ്ടാവണമെന്ന് യോഗത്തില്‍ മന്ത്രി കെ. കൃഷ്ണന്‍കുട്ടി നിര്‍ദ്ദേശിച്ചു. പൈപ്പ് പൊട്ടല്‍ കുറയ്ക്കുന്നതിന് കര്‍ശനമായ ഇടപെടലുകള്‍ ഉണ്ടാവണമെന്നും അദ്ദേഹം നിര്‍ദ്ദേശിച്ചു.

Please follow and like us:

ആനപ്പാറ പൊറ്റമ്മല്‍ കടവില്‍ തടയണ നിര്‍മാണം തുടങ്ങി; ചെലവ് ആറ് കോടി രൂപ

ആനപ്പാറ പൊറ്റമ്മല്‍ കടവില്‍ തടയണ നിര്‍മാണം തുടങ്ങി; ചെലവ് ആറ് കോടി രൂപ

ആനപ്പാറ പൊറ്റമ്മല്‍ കടവില്‍ തടയണയുടെ നിര്‍മ്മാണോദ്ഘാടനം തിരുത്ത് പറമ്പ് മേതൃക്കോവില്‍ കീഴ്തൃക്കോവില്‍ ക്ഷേത്ര പരിസരത്ത് ഇന്ന് നിര്‍വഹിച്ചു. കൂട്ടിലങ്ങാടി ഗ്രാമ പഞ്ചായത്തിലെ കടലുണ്ടിപ്പുഴയ്ക്ക് കുറുകെയുള്ള ആനപ്പാറ പൊറ്റമ്മല്‍ കടവിലാണ് തടയണ  നിര്‍മിക്കുന്നത്. ആറുകോടി രൂപ ചെലവിലാണ് തടയണയുടെ നിര്‍മ്മാണം പൂര്‍ത്തീകരിക്കുക. ആനക്കയം, കൂട്ടിലങ്ങാടി ഗ്രാമപഞ്ചായത്തുകളിലെ ജനങ്ങള്‍ക്ക് പ്രയോജനകരമാകുന്നതാണ് പദ്ധതി. കടലുണ്ടി പുഴയില്‍ എഴുപത് മീറ്റര്‍ നീളത്തിലും രണ്ടര മീറ്റര്‍ ഉയരത്തിലുമുള്ള കോണ്‍ക്രീറ്റ് തടയണ നിര്‍മിച്ച് ജലം സംഭരിക്കുന്നതിനാണ് പ്രവൃത്തി  വിഭവനം ചെയ്തിരിക്കുന്നത്.
തടയണയുടെ ഇരു കരകളിലും മുകള്‍ ഭാഗത്തേക്ക് 50 മീറ്റര്‍ നീളത്തിലും താഴ്ഭാഗത്ത് 40മീറ്റര്‍ നീളത്തിലും ആറു മീറ്റര്‍ ഉയരത്തിലും കോ ണ്‍ക്രീറ്റ് പാര്‍ശ്വഭിത്തി നിര്‍മിക്കും. തടയണയുടെ ജലനിരപ്പ് ക്രമീകരിക്കുന്നതിനായി 1.2 ണ്മ 2.5 മീറ്റര്‍ അളവിലുള്ള അഞ്ചു വെന്റുകള്‍ നല്‍കിയിട്ടുണ്ട്. തടയണയുടെ ഷട്ടര്‍ അടക്കുമ്പോള്‍ കടലുണ്ടിപുഴയുടെ ഇരു കരകളിലെയും, കൂട്ടിലങ്ങാടി, ആനക്കയം ഗ്രാമപഞ്ചായത്തുകളിലെ ഏകദേശം മൂന്ന് കി.മീ നീളത്തില്‍ ഭൂഗര്‍ഭ ജലവിധാനം ഉയര്‍ത്തുന്നതിനും അതുവഴി 700ഓളം ഹെക്ടര്‍ കൃഷി സ്ഥലത്തിന് ഇതിന്റെ പ്രയോജനം ലഭ്യമാകും.
കേരളത്തിലെ എല്ലാ  കുടുംബങ്ങളിലേക്കും കുടിവെള്ളം പൈപ്പ് ലൈന്‍ വഴി എത്തിക്കുക എന്നതാണ് സര്‍ക്കാര്‍ ലക്ഷ്യമെന്ന് ഉദ്ഘാടന ചടങ്ങില്‍ പങ്കെടുക്കാന്‍ എത്തിയ നാട്ടുകാരെ ഓര്‍മ്മിപ്പിച്ചു. നടപ്പ് സാമ്പത്തിക വര്‍ഷം ആറു ലക്ഷം കുടുംബങ്ങള്‍ക്ക് കുടിവെള്ളം എത്തിക്കുക എന്നതായിരുന്നു സര്‍ക്കാര്‍ ലക്ഷ്യമിട്ടിരുന്നത്. എന്നാല്‍ കാര്യക്ഷമമായ പ്രവര്‍ത്തനത്തിലൂടെ 10 ലക്ഷം കുടുംബങ്ങള്‍ക്ക് പൈപ്പ് ലൈന്‍ വഴി കുടിവെള്ളം ഈ വര്‍ഷംതന്നെ നല്‍കാന്‍ കഴിയുന്ന സാഹചര്യമാണ് ഇപ്പോഴുള്ളതെന്ന സന്തോഷകരമായ വിവരം അവരോട് പങ്കുവച്ചു.
മലപ്പുറം ജില്ലയിലെ ശാസ്ത്രീയ കൃഷി രീതി വീപുലീകരിണ്ടേതുണ്ട്. അമൂല്യസ്വത്തായ ജലം ജീവനും, കൃഷിക്കും ഉപയുക്തമാക്കുന്ന തരത്തില്‍ വിതരണം ചെയ്യണം. ശുദ്ധജല ക്ഷാമത്തിന് ശാശ്വത പരിഹാരത്തിനായി കക്ഷി രാഷ്ട്രീയ ഭേദമന്യേ ജനപ്രതിനിധികളും ഉദ്യോഗസ്ഥരും ശ്രമിച്ചാല്‍ കേരളത്തില്‍ വലിയ മാറ്റം ഉണ്ടാക്കാന്‍ സാധിക്കും. കൂടാതെ ജലലഭ്യതയുടെ സാധ്യതകള്‍ മനസിലാക്കി പ്രവര്‍ത്തിക്കേണ്ടതുണ്ടെന്ന കാര്യവും ചൂണ്ടിക്കാട്ടി.

Please follow and like us:

തൊഴില്‍ അവസരങ്ങള്‍ക്ക് സ്‌കില്‍ ഡവലപ്‌മെന്റ് വിദ്യാഭ്യാസ പദ്ധതി അനിവാര്യം : മന്ത്രി കെ. കൃഷ്ണന്‍കുട്ടി

തൊഴില്‍ അവസരങ്ങള്‍ക്ക് സ്‌കില്‍ ഡവലപ്‌മെന്റ് വിദ്യാഭ്യാസ പദ്ധതി അനിവാര്യം : മന്ത്രി കെ. കൃഷ്ണന്‍കുട്ടി

സാങ്കേതിക വിദ്യയുടെ വളര്‍ച്ച സൃഷ്ടിക്കുന്ന തൊഴില്‍ അവസരങ്ങള്‍ പ്രയോജനപ്പെടുത്താന്‍ സ്‌കില്‍ ഡവലപ്പ്‌മെന്റ് വിദ്യാഭ്യാസ പദ്ധതി അനിവാര്യമെന്ന് ജലവിഭവ വകുപ്പ് മന്ത്രി കെ. കൃഷ്ണന്‍കുട്ടി പറഞ്ഞു. വണ്ടിത്താവളം കെ.കെ.എം.എച്ച.് സ്‌കൂളില്‍ പുതിയ കൊമേഴ്‌സ് ലാബ് ഉദ്ഘാടനം നിര്‍വ്വഹിച്ച് സംസാരിക്കുകയായിരുന്നു മന്ത്രി. സാങ്കേതിക മേഖലയില്‍ നിര്‍മ്മിത ബുദ്ധി, റോബോട്ടിക്ക്‌സ്, ഡിജിറ്റല്‍ ലേണിങ്, ത്രീഡി പ്രിന്റിങ് തുടങ്ങി വിവിധ രംഗങ്ങളില്‍ വലിയ വളര്‍ച്ചയാണ്. ഇത്തരം സാധ്യതകള്‍  പ്രയോജനപ്പെടുത്താന്‍ കഴിയുംവിധം പാഠ്യപദ്ധതിയില്‍ മാറ്റമുണ്ടാകണം. പഠനത്തിന്റെ ഭാഗമായി വിദ്യാര്‍ത്ഥികളില്‍ അന്വേഷണ ത്വര വളര്‍ത്താന്‍ കഴിയണമെന്നും ജനാധിപത്യത്തിന്റെ ഗുണഫലങ്ങള്‍ എല്ലാവര്‍ക്കും ലഭിക്കാന്‍ അനുയോജ്യമായ ചര്‍ച്ചകളും ചിന്തകളും ഉണ്ടാവണമെന്നും മന്ത്രി പറഞ്ഞു. പട്ടഞ്ചേരി ഗ്രാമപഞ്ചായത്ത് പ്രസിഡന്റ് കെ. ജയശ്രീ  അധ്യക്ഷയായ പരിപാടിയില്‍ പെരുമാട്ടി പഞ്ചായത്ത് പ്രസിഡന്റ് ജി.മാരിമുത്തു, ത്രിതല പഞ്ചായത്ത് ജനപ്രതിനിധികളായ സജിത, പി.എസ്.ശിവദാസ്,  ജി. ജയന്തി, ധനലക്ഷ്മി, പി.ടി.എ. പ്രസിഡന്റ് എ. ഹരിദാസ്, പ്രധാന അധ്യാപകന്‍ എ. ശശികുമാര്‍, പ്രിന്‍സിപ്പല്‍ പി.ടി ശ്രീകുമാര്‍, ജി.വിന്‍സെന്റ്, സി.എച്ച.് അരുണ്‍കുമാര്‍ എന്നിവര്‍ സംസാരിച്ചു.

Please follow and like us: